Etiopia ka konfirmuar të hënën tre vdekjet e para nga virusi hemorragjik Marburg, pas shpërthimit të raportuar në rajonin Omo, pranë kufirit me Sudanin e Jugut.
Ministrja e Shëndetësisë, Mekdes Daba, bëri të ditur se autoritetet kanë testuar 17 raste të dyshuara në jug të vendit, ndërsa përhapja e shpejtë e infeksioneve ka detyruar vendosjen e masave urgjente të përmbajtjes.
129 persona që kanë pasur kontakt me të infektuarit janë izoluar dhe monitorohen nga afër, ndërkohë që Sudani i Jugut ka lëshuar paralajmërime shëndetësore për banorët e zonave kufitare që të shmangin kontaktin me lëngje trupore.
Në terren kanë mbërritur ekipe nga OBSH-ja dhe Africa CDC, të cilat po ndihmojnë me testimet dhe menaxhimin e situatës. Javën e kaluar, drejtori i përgjithshëm i Africa CDC, Jean Kaseya, e quajti shpërthimin “shqetësues”.
Virusi Marburg, i ngjashëm me Ebolën dhe me origjinë nga lakuriqët e frutave, përhapet përmes kontaktit të ngushtë me lëngje trupore ose sipërfaqe të kontaminuara. Simptomat përfshijnë ethe, dhimbje muskujsh, diarre, të vjella dhe, në raste të rënda, hemorragji fatale. Aktualisht nuk ka vaksinë ose trajtim të miratuar kundër virusit.
Shpërthimet e Marburgut janë të rralla, por me rrezik të lartë. Sipas OBSH-së, raste të mëhershme janë regjistruar në Ruandë, Tanzani, Guinenë Ekuatoriale, Angolë, Kongo, Kenia, Afrikën e Jugut, Ugandë dhe Ganë.