Eurodeputeti spanjoll, Jorde Sole, gjatë fjalimit të tij në Parlamentin Evropian, ka theksuar se pavarësia e Kosovës është e pakthyeshme dhe e ligjshme.
Ai, pengimin e perspektivës evropiane të Kosovës e ka quajtur egoiste, derisa shtoi se mosnjohja e shtetësisë së Kosovës nga pesë vendet përfshirë këtu Spanjën, është një reflektim i frikës.
“Pavarësia e Kosovës është e pakthyeshme, e ligjshme dhe demokratike. Mosnjohja nga Spanja është një reflektim i frikës për të krijuar precedentë në lidhje me mënyrat për t’u bërë shtet. Pengimi i perspektivës evropiane të Kosovës është egoiste dhe na dobëson ne si Bashkim Evropian”, ka shkruar Sole në Twitter.
✊🏼La independència de Kosovo és irreversible, legal i democràtica.
❌ El no reconeixement per part d’Espanya és relfexe de la por a sentar precedents en quan a les vies per esdevenir un estat.
🗣Obstaculitzar la perspectiva europea de Kosovo és egoista i ens debilita com a Unió pic.twitter.com/CxrnyoUBAb
— Jordi Solé🎗🇪🇺 (@jordisolef) July 6, 2022
Në anën tjetër, eurodeputeti austriak, Lukas Mandl, teksa ka folur për liberalizimin e vizave për qytetarët e Kosovës, ka thënë se Bashkimi Evropian ka bërë premtime, por s’i ka mbajtur ato.
Kosovën e ka cilësuar si vend me demokraci të qëndrueshme që sundimin e ligjit “e ka bërë me shpejtësi të madhe”.
Ndonëse, ai konsideron se ende ka nevojë për përmirësim në sundimin e ligjit, megjithatë Mandl ka deklaruar se Kosova disponon Kushtetutë të fortë.
My speech on the Kosovo-Report of the European Parliament. We will vote on it today. #Kosovo #EU #RotWeissRot in #Europa 🇽🇰🇦🇹🇪🇺 (English version below.) https://t.co/EuLPox3hcp
— Lukas Mandl (@lukasmandl) July 6, 2022
Ndryshe, deputetët e Parlamentit Evropian, gjatë seancës plenare që po mbahet të mërkurën e gjashtë korrikut, do të votojnë raportet për Kosovën, Serbinë dhe Bosnjë e Hercegovinën.
Ky votim pason debatin e zhvilluar të martën e pesë korrikut në PE për këto raporte.
Sa i përket Kosovës, gjatë debatit të së martës, kanë dominuar thirrjet për liberalizimin e vizave.
Po ashtu, është bërë thirrje për progres në dialogun Kosovë-Serbi, i cili ndërmjetësohet nga Bashkimi Evropian.
Raportuesja për Kosovën në Parlamentin Evropian, Viola von Cramon, gjatë fjalimit të saj, ka mirëpritur qëndrimet e Kosovës lidhur me luftën që po zhvillohet në Ukrainë.
Ajo ka ripërsëritur thirrjen për liberalizimin e vizave për qytetarët e Kosovës, që sipas saj është zvarritur si proces.