Ish-kryeministri i Kosovës dhe deputeti i Lidhjes Demokratike të Kosovës(LDK), Avdullah Hoti, i ka quajtur mashtrues kryeministrin aktual të vendit, Albin Kurti dhe kryeparlamentarin, Glauk Konjufca, të cilët, sipas tij, nuk i mbajtën premtimet që i dhanë për të ardhur në pushtet.
Ai të njëjtën fjalë e kishte edhe për presidenten e Kosovës, Vjosa Osmani, pasi sipas tij, ajo së bashku me Kurtin tani që ishte në vizitë zyrtare kryeministri në detyrë i Malit të Zi, Dritan Abazoviq, edhe pse e kanë kundërshtuar marrëveshjen e demarkacionit, në takimet e tyre as nuk e kanë përmendur këtë çështje.
“Tash ishte kryeministri i Malit të Zi në Kosovë, e kanë kundërshtuar me dhunë Marrëveshjen e Demarkacionit, as Kurti as Osmani ‘qele guri gojën’, asnjëri nuk e përmend Demarkacionin, sepse kanë thënë janë falë 8 mijë e 200 hektarë, me shtru si temë me thënë hajde ta përmirësojmë t’i nxjerrim argumentet e reja në tavolinë, ‘qele gur gojën’, asnjëri nuk flasin. A nuk është mashtrim ky?”, është shprehur Hoti.
Duke treguar pse i quan mashtrues, ai në një intervistë për emisionin FIVE, ka përmendur edhe çështjen e Asociacionit, derisa ka thënë se Kurti dhe Konjufca e kanë kundërshtuar ashpër, por më pas kanë pranuar se “ka Asociacion”.
“A nuk është mashtrim edhe i Kurtit edhe i Konjufcën që e kanë kundërshtuar me të madhe Asociacionin, ‘nuk ka as asi, as ksi, ka vdekur Asociacioni’, kanë thënë më 12 shkurt, e më pas del në televizionin publik e thotë që ‘po ka Asociacion’”, ka thënë ai.
Ai ka shtuar se nuk është duke i fyer kryeministrin Kurti dhe kryparlamentarin Konjufca, por vetëm se është duke krahasuar premtimet e tyre dhe veprimet që kanë bërë tani.
Ai ka thënë se nëse dikush nuk i qëndron fjalëve dhe premtimeve kur ka përgjegjësin institucionale dhe i ndryshon fjalët duke pranuar ato që ka kundërshtuar, atëherë, sipas tij, ai quhet mashtrues.
“Nuk kemi ndryshe si me i quajt këta, përveçse mashtrues. Nuk dua t’i fyej, vetëm se jam duke i krahasuar premtimet fjalët edhe veprimet që i kanë tash. Nëse nuk i përmbahesh fjalëve dhe premtimeve tash kur e ke përgjegjësin institucionale dhe i ndërron fjalët, i pranon ato që i ke kundërshtuar dhunshëm, atëherë je mashtrues”, ka deklaruar ai.
Gjithashtu, ai ka thënë se ata kanë mashtruar për të ardhur në pushtet, pasi kanë kundërshtuar Asociacionin, dhe tani e kanë pranuar atë për të qëndruar në pushtet, pasi siç ka shtuar ai “ndryshe nuk do të kishte pasur mundësi të vazhdonin më tutje qeverisje”.