Shefja e Grupit Parlamentar të Lëvizjes Vetëvendosje, Mimoza Kusari-Lila, ka reaguar ndaj pretendimeve për takime të fshehta me Serbinë, duke sqaruar se aktivitetet e organizuara nga Center for Inclusive Governance (CIG) janë transparente dhe zhvillohen që nga viti 2010, me mbështetje të Ministrisë së Punëve të Jashtme të Zvicrës.
Ajo thekson se në takime kanë marrë pjesë përfaqësues nga pozita dhe opozita e Kosovës dhe Serbisë, si dhe përfaqësues të QUINT-it dhe MPJ-së së Zvicrës.
Sipas Kusari-Lilës, nuk negociohet dhe nuk merren vendime, ndërsa agjendat, pjesëmarrësit dhe raportet janë publike në faqen e CIG.
“Aludimet dhe pretendimet se në këto takime janë marrë vendime në fshehtësi apo se janë arritur marrëveshje jashtë syve të publikut janë të pavërteta. Duke qenë se këto pretendime paraqiten me një agjendë të qëllimshme njëllosëse, e cila vazhdon edhe në këtë vit të ri, ato përbëjnë dezinformim”, ka shkruar Kusari-Lila.