Ish-ushtaraku Hysen Gecaj i ka vlerësuar të gabuara veprimet e Qeverisë së Kosovës në katër komunat e veriut pa u koordinuar me Shtetet e Bashkuara të Amerikës.
Ai në “Five” tha se Qeveria e Kosovës është dashur ta fitojë besimin e serbëve lokalë dhe jo të veprojë me forcë, sepse sipas tij, në veri duhet zgjidhje politike e jo përmes forcës.
“Hap i gabuar ka qenë moskoordinimi me amerikanët dhe mosmbështetja e sugjerimeve të tyre që ata kryetarë t’i kryejnë detyrat në objekte që do dukeshin më pak provokativ, që të fitohet besimi i popullatës… dëshira politike që duket se pushteti është i vendosur e po bën diçka të fortë, dërgoi policë për t’i ruajtur kryetarët, pastaj pasoi diçka më e keqe, pastaj vjen KFOR-i e ta ruan Njësinë Speciale. Këto gabime në fakt një tentativë të mëhershme të të fitohet besimi te serbët e Kosovës, e ka kthyer jo në pikën zero, por edhe më mbrapa”, tha ai.
Gecaj tha se edhe serbët lokalë janë lodhur me tensionet e krijuara në veri të vendit, derisa shtoi se Qeveria fillimisht është dashur të përpiqet të gjejë zgjidhje politike në mënyrë që serbët e veriut të kthehen nga Kosova e të mos ndikohen nga Serbia.