Ministrja e Jashtme e Kosovës, Donika Gërvalla, pas njoftimit se Policia e Kosovës gjeti letërnjoftimin dhe veturën e Milorad Jevtiqit në vendin e sulmit terrorist, ka thënë se ai në katër nga pesë vizitat e tij në Kosovë, e ka kaluar kufirin në shoqëri me Danilo Vuçiqin, djalin e presidentit serb, Aleksandër Vuçiq.
Ajo në një postim në llogarinë e saj në platformën “X”, u shpreh se Jevtiq është bashkëpunëtor i ngushtë i Danilo Vuçiqit, djalit të presidentit serb.
“Policia e Kosovës gjeti letërnjoftimin dhe veturën e Milorad Jevtiqit në vendin e sulmit terrorist. Jevtić është bashkëpunëtor i ngushtë i Danilo Vuçiqit, djalit të presidentit serb, Aleksandar Vuçiq. Në katër nga pesë vizitat në Kosovë, ai ka kaluar kufirin në shoqëri me Danilo Vuçiqin”, shkroi ajo.
Siç thotë ministrja Gërvalla, kjo siguron dëshmi të mëtejshme të aktit të agresionit të Serbisë kundër Kosovës dhe përfshirjes së saj të drejtpërdrejtë në planifikimin dhe ekzekutimin e sulmit terrorist të 24 shtatorit.
“Vetëm veprimet vendimtare kundër regjimit të Vuçiqit do të parandalojnë përshkallëzimin e mëtejshëm”, tha ajo.