Ministrja e Punëve të Jashtme, Donika Gërvalla, ka deklaruar se Serbia ka refuzuar përpjekjet për normalizimin e marrëdhënieve me Republikën e Kosovës.
Ajo i ka bërë thirrje Bashkimit Evropian që të sanksionojë Serbinë për aktin e agresionit kundër Kosovës më 24 shtator 2023 dhe ka shprehur shqetësimin se çdo vonesë në këtë çështje do të kontribuojë vetëm në përshkallëzimin e tensioneve në rajon.
“Serbia ka refuzuar edhe një herë përpjekjen për normalizimin e marrëdhënieve me Republikën e Kosovës. Ne i bëjmë thirrje Bashkimit Evropian që të sanksionojë Serbinë për aktin e agresionit kundër Kosovës më 24 shtator 2023. Çdo vonesë do të shërbejë vetëm për të nxitur përshkallëzimin e mëtejshëm”, ka shkruar Gërvalla në platformën X.
Serbia once again rejected an attempt to normalize relations with the Republic of Kosova.
We urge the European Union to sanction Serbia for the act of aggression against Kosova on September 24th 2023.
Any delay will only serve to fuel further escalation. https://t.co/VBXppa9JDL
— Donika Gërvalla-Schwarz (@gervallaschwarz) October 26, 2023
Qeveria e Kosovës ka dalë me njoftim pas takimit të kryeministrit Albin Kurti dhe liderëve evropianë në Bruksel dhe takimin e fundit me emisarin e BE-së, Mirosllav Lajçak.
Në njoftim thuhet se Kurti ka ritheksuar edhe një herë se është i gatshëm ta nënshkruajë marrëveshjen bazike për normalizim të marrëdhënieve me Serbinë dhe po ashtu atë për Asociacionin apo siç thuhet në njoftim “draftin e ofruar nga BE-ja dhe ShBA-të për zbatimin e nenit 7 në ndërlidhje të nenit 10 të Marrëveshjes Bazike”.
Një gjë të tillë, sipas Qeverisë së Kosovës, e ka refuzuar presidenti i Serbisë, Aleksandër Vuçiq. Ai ka kërkuar që “që t’i pranohet një letër anësore me të cilën praktikisht i zhbën tri parime të Marrëveshjes Bazë, të Aneksit të Zbatimit, si dhe të draftit të propozuar nga pesë emisarët më 21 tetor 2023”
Në fund të takimit, sipas njoftimit, kryeministri Kurti tha “Pranimi nënkupton nënshkrim, vetëm nënshkrimi nënkupton pranimin dhe garanton zbatimin”.
Tutje, sipas njoftimit të Qeverisë, Kurti gjatë takimit me kancelarin e Gjermanisë, Olaf Scholz, me presidentin e Francës, Emmanuel Macron, kryeministren e Italisë, Giorgia Meloni, presidentin e Këshillit Evropian, Charles Michel, zëvendëspresidentin e Komisionit Evropian dhe përfaqësuesin e Lartë për Politikë të Jashtme dhe të Sigurisë, Josep Borrell, si dhe emisarin e tij, Miroslav Lajcak, ka thënë se pas sulmit terrorist në Banjskë, prioritet është siguria në Kosovë, e veçanërisht siguria e kufirit me Serbinë.