Një ngjarje makabre ka tronditur Meksikën qendrore, ku gjashtë koka të prera u gjetën të martën në mëngjes në një rrugë që lidh shtetet e zakonisht paqësore Puebla dhe Tlaxcala, raporton media ndërkombëtare, përcjell Dukagjini.
Autoritetet lokale konfirmuan zbulimin, por nuk dhanë detaje mbi motivin e vrasjeve dhe as nuk identifikuan ndonjë grup kriminal që mund të ishte përgjegjës.
Sipas mediave vendase, në vendngjarje u gjet një batanije me një mesazh kërcënues drejtuar bandave rivale, i nënshkruar nga një grup që e quan veten “La Barredora” – që në shqip do të thotë “pastruesi”. Ky është emri i një organizate pak të njohur kriminale që vepron në shtetin perëndimor të Guerrero, por mbetet e paqartë nëse ata qëndrojnë pas sulmit.
Zyra e prokurorit lokal ka bërë të ditur se kokat e gjetura në Tlaxcala i përkisnin burrave dhe ka hapur një hetim për zbardhjen e rastit, njofton agjencia AFP.
Rajoni, përveç trafikut të drogës, njihet edhe për kontrabandën e karburantit, të quajtur “huachicolea”, një aktivitet i paligjshëm që gjeneron miliarda dollarë për grupet kriminale.
Deri më tani, autoritetet federale nuk kanë reaguar lidhur me këtë rast. Ngjarja ndodhi në kohën kur administrata e Presidentes Claudia Sheinbaum po zhvillon një fushatë të gjerë kundër trafikimit të fentanilit.
Edhe pse Puebla dhe Tlaxcala zakonisht nuk njihen për dhunë ekstreme të karteleve si në rajonet e tjera të Meksikës, vitet e fundit është shënuar një rritje e përleshjeve kriminale. Që nga viti 2006, kur qeveria angazhoi ushtrinë kundër bandave, vendi ka regjistruar qindra mijëra të vrarë dhe dhjetëra mijëra të zhdukur.