Policia e Kosovës ka bërë të ditur se një person është gjetur i vdekur në fshatin Sllatinë të Kosovës. Lajmi është konfirmuar nga zëdhënësi i Policisë për rajonin e Prishtinës, Agron Borovci, i cili njoftoi se rasti është në hetim.
Viktima është gjetur brenda një automjeti “Smart” me targa të Shqipërisë. Sipas Borovcit, informata për trupin e pajetë është pranuar rreth orës 07:30 të mëngjesit.
“Rreth orës 07:30 kemi pranuar informatën për një trup të pajetë brenda një veture në fshatin Sllatinë. Policia menjëherë ka dalë në vendin e ngjarjes, si dhe mjekët emergjentë të cilët kanë konstatuar vdekjen e viktimës, mashkull. Aktualisht, policia po ndërmerr të gjitha veprimet e duhura hetimore dhe ato të ekzaminimit, me qëllim sqarimin dhe ndriçimin e plotë të ngjarjes dhe në koordinim me prokurorin e shtetit ka nisur një hetim mbi vdekjen”, ka njoftuar Borovci.
