Ish-gjenerali i NATO-s, Wesley Clark, në një interviste në CNN, ka thënë se nëse ka problem në Ukrainë, mund të vijë problemi edhe në Ballkan.
Clark ka thënë se Serbia është dora e Rusisë në Ballkanin Perëndimor.
Tutje, ish-gjenerali në një intervistë bashkë me kryeministrin e Kosovës, Albin Kurti, i cili tha se “Serbia dhe Rusia imitojnë njëra-tjetrën”, ai [Clark] ishte në të njëjtën linjë me të, duke thënë se presidenti serb, Aleksandër Vuçiq, përkundër se përdor dy anët, Perëndimin e Rusinë, ai në një moment dëshiron ta bëjë atë që presidenti rus, Vladimir Putin, po bën në Ukrainë.
“Dora e Rusisë ndihet në Ballkan, Serbia është dora e Rusisë në Ballkan dhe i shërben interesave të Rusisë. Vuçiq është i mençur, dëshiron të duket sikur po luan në dy anët, por kur të vjen koha, ai do të bëjë atë që do Putini që ai të bëjë”, ka thënë ai.
“Dhe çfarë ai do nga Putini, sigurisht është autoriteti për të përdorur trupat e tij në Kosovë, të paktën të marrë gjysmën e pjesës veriore të Kosovës dhe ndoshta më shumë. Njëkohësisht, duan ta ndajnë Bosnjën, ta marrin Republikën Srpska dhe ta bëjnë ‘Serbinë e Madhe’. E gjithë kjo ka të bëjë me spastrim etnik në Ballkan”.
“Kemi parë shumë dhunë, vrasje në 30 vjetët e fundit dhe kemi menduar se NATO-ja e ka ndaluar, por nëse ka probleme në Ukrainë ai problem do të vijë në Ballkan dhe liderë, si kryeministri Kurti, duhet të përballen me të”, ka thënë Clark.
“NATO duhet të bëjë më shumë. Shikoni shembullin e Kosovës sot, 25 vjet demokraci, shtet i lirë. Kështu duhet të jetë edhe për Ukrainën, mund ta shpëtojmë Ukrainën nëse ngrihemi dhe e bëjmë [ndërhyjmë]. Kjo është detyra jonë”, ka thënë ndër të tjera Clark.