Gjermani Franco Foda është trajneri i ri i përfaqësues së Kosovës në futboll. Foda u prezantua gjatë ditës së shtunë nga Federata e Futbollit të Kosovës (FFK).
I pari i FFK-së, Agim Ademi, bëri të ditur se Foda ka nënshkruar kontratë dyvjeçare, duke theksuar se tranjeri i ri do t’i ketë duar të lira për të vendosur.
“Ka kontratë dyvjeçare. Në këto dy vjet, në këto garat e radhës, do të realizojmë programin e tij dhe kërkesat tona. Në futbollin tonë s’ka asgjë të sigurt, por ne po përpiqemi ta bëjmë punën sa më të mirë.
Foda i ka duart e lira për të vendosur, po vjen me ekipin e tij, nuk do të ketë asnjë ndërhyrje, por do ta ketë mbështetjen e Federatë”, ka thënë Ademi, gjatë prezantimit të trajnerit të ri të Kosovës.
Kurse, Foda nisi prezantimin e tij me një fjalë në gjuhën shqipe, duke thënë “mirëdita”.
“Faleminderit, është një ditë speciale për të gjithë qytetarët në Kosovë, edhe për mua është një ditë speciale, jam i kënaqur që jam këtu”, ka shtuar Foda.