Anëtari i PDK-së, Xhavit Haliti, ka kritikuar kryeparlamentarin e ri, Dimal Basha, pas publikimit të një artikulli që, sipas tij, cenon figurën e UÇK-së dhe pjesëmarrësve të saj.
Haliti tha në emisionin Ditari në Tëvë1 se nuk kishte qenë në dijeni për ekzistencën e një artikulli të tillë dhe kërkoi që organet e drejtësisë të marrin në pyetje Bashën.
“Pse unë nuk e kam ditur që ekziston një artikull i tillë, të paktën nga njerëzit e PDK-së nëse e kanë ditur? Asnjë prej drejtuesve politikë të UÇK-së nuk janë sot drejtues të institucioneve të Kosovës. Dimal Bashën duhet me e marrë në pyetje organet e drejtësisë në Kosovë”, tha ai.
Haliti shtoi se në votimin për kryeparlamentarin janë bashkuar, sipas tij, të gjithë ata që nuk kanë pasur lidhje me UÇK-në, duke shprehur keqardhje për disa ish-pjesëtarë të saj që votuan për Bashën.
Ai i bëri thirrje kryeministrit Albin Kurti që të ndërhyjë, duke e shkarkuar Bashën nëse ky nuk jep dorëheqje.
Sipas Halitit, kryeparlamentari i ri po i shërben agjendave të huaja.
“Unë besoj që ai nuk do të japë dorëheqje, por atë duhet ta shkarkojë kryeministri, nëse duhet, sepse ata e kanë zgjedhur deputetët e parlamentit. Kushtetuta dhe vendi ynë nuk duhet të pranojnë bedelë të tillë të shërbimeve të huaja që punojnë për ta. Unë edhe sot edhe në të ardhmen kam me kërkua llogari: kush e ka paguar Dimal Bashën me bë artikull të tillë kundër UÇK-së?”, përfundoi Haliti.