Si çdo fillim qershor edhe këtë vit, hapësira në Pallatin e Rinisë nga sot do t’i mbledh dashamirët e librit në Kosovë.
Për herë të 25-të radhazi, është hapur Panairi i Librit. E marr parasysh ndryshimet e vrullshme në teknologji së fundmi, pikërisht nga kjo u nxit edhe motoja e sivjetme “Inteligjenca rrjedh nga libri”.
Me gjithë temperaturat e larta sot në mesditë, një numër njerëzish morën pjesë në hapjen solemne.
“Në 26 vjetorin e çlirimit të Prishtinës, është edhe 25 vjetori i panairit të librit kjo nënkupton që Prishtina po ecën me librin”,ka theksuar Sibel Halimi, Drejtoreshë e Drejtorisë së Kulturës në Komunën e Prishtinës.
Në hapësirat brenda Pallatit të Rinisë, mund të gjendet edhe stenda e Shtëpisë Botuese “Dukagjini”, që këtë vit sipas përfaqësuesve të librarisë ka shumë risi.
“Kolana e librave të Heses, është përmbyllur me 16 libra, është mbyllur kolana e “Evropës kreative” dhe gjithashtu është mbyllur seria e lekturave shkollore, që i kemi nga klasa e parë deri në të pestën”, ka deklaruar Liridona Bytyqi, Redaktore gjuhësore në Shtëpinë Botuese “Dukagjini”.
Lexues të shumtë ishin të interesuar menjëherë për blerë libra të ndryshëm.
“Jam i interesuar për autobiografi, me gjet diçka udhëpërshkrime, sepse kam marrë shumë romane, letërsi të ndryshme por udhëpërshkrimet tash po më bajnë përshtypje të shumta”, ka theksuar Xhavit Fetahaj, vizitor i panairit.
“Po e shoh që interesim të madh nuk ka si vitet e kaluara, kurse në pyetjen e juaj se për çka jam më i interesuar, unë jam më shumë ka klasikja, letërsia greke, romake, letërsitë e huaja”, ka thënë Oliver Sejdaj, vizitor i panairit.
Në panair ishin të pranishëm edhe grupmosha të reja, të cilët janë të apasionuar pas librit.
“Sot kam ardhur në panair për të blerë ndonjë libër, sepse mua më pëlqen shumë të lexoj, zakonisht në muaj lexoj deri në 6-të libra më se shumti më pëlqejnë ato me aventura dhe fantazi”, ka theksuar nxënësja, Amira Çitaku.
Panairi i Librit në Prishtinë do të jetë i hapur deri të dielën
Pos librave, edhe ngjarjet këtë vit do të jenë të shumta, përfshirë përvjetorët e shkrimtarëve si 100-vjetori i lindjes së Martin Camajt, 150-vjetori i lindjes së Faik Konicës, 200-vjetori i lindjes së Pashko Vasës e 400-vjetori i lindjes së Pjetër Bogdanit, që organizohen gjatë ditëve të panairit.