Kryetari i Aleancës për Ardhmërinë e Kosovës, Ramush Haradinaj, në një vizitë në Gjermani, në bashkëbisedim me bashkatdhetarët ka theksuar se njerëz të dëshmuar nga të gjitha fushat po i bashkohen Aleancës.
Kështu shkroi ai në një postim në Facebook, ku tha se ata po i bashkohen AAK-së sepse sipas tij po e shohin si alternativën më serioze politike.
“Falë një pune përkushtuese të strukturave, Aleanca po kalon nëpër një momentum shumë pozitiv në diasporë. Bashkatdhetarë të shumtë, njerëz të dëshmuar nga të gjitha fushat, po i bashkohen Aleancës sepse ata po e shohin si alternativën më serioze politike”, ka shkruar Haradinaj.
Kreu i AAK-së, ka potencuar se AAK-ja e ndjen peshën dhe rëndësinë që ka mërgata, me mirënjohje të përjetshme për kontributin e jashtëzakonshëm të saj në arritjen e lirisë dhe në procesin e shtetndërtimit.
“Është kënaqësi e veçantë që sa herë që jam në Gjermani, shoh nga afër punën serioze që bëhet falë strukturave të Aleancës në këtë shtet, udhëhequr nga Ukë Blakaj”.
“Motrat e vëllezërit tanë që jetojnë jashtë vendit, janë edhe partnerët tanë në zhvillim, sepse Kosova e fortë fuqizon edhe më shumë njerëzit e saj në mbarë botën”.