Kryetari i Aleancës për Ardhmërinë e Kosovës, Ramush Haradinaj, të mërkurën e 9 nëntorit, ka mbajtur një takim me qytetarët e Komunës së Vushtrrisë, para të cilëve, ka shprehur shqetësimin e tij në lidhje me situatën në vend.
“Sa i përket krizës ekonomike dhe asaj energjetike, jam i bindur se kjo qeveri nuk do të bëjë asgjë të dobishme. Është për keqardhje papërgjegjësia dhe injoranca e tyre në qeverisjen e vendit”, ka shkruar Haradinaj në Facebook.
Më tej, ai ka thënë që Qeveria Kurti nuk e ka menaxhuar si duhet procesin e dialogu, duke bërë gabim pas gabimi, e të cilat edhe i kanë zbehur raportet me aleatët amerikanë, të cilët ishin me në të gjitha fazat e rrugëtimit tonë drejt lirisë.
“Largimi nga këshillat dhe kërkesat e tyre, pikërisht, në fazën finale kur pritej përmbyllja e Marrëveshjes ligjërisht të obligueshme ndërmjet Kosovës dhe Serbisë për njohje reciproke, është gabim i tmerrshëm”, ka vijuar ai.
Këto politika, sipas Haradinaj, mund të kenë pasoja të rrezikshme për vendin dhe se kryeministri Kurti duhet që sa më parë të kthehet nga kryeneqësia e tij, dhe mos t’i japë Serbisë mundësinë që të krijojë situata destabilizimi në Kosovë e rajon.