Kryetari i AAK-së, Ramush Haradinaj, ka kërkuar nga kryeministri i Kosovës, Albin Kurti, që t’i rrisë pagat në sektorin publik. Kjo bëhet sipas tij me anë të miratimit të Ligjit të Pagave.
Haradinaj në Debat Plus, ka thënë se kërkesa e sindikatave për 100 euro shtesë deri në miratimin e Ligjit të Pagave, është i arsyeshëm.
I pari i AAK-së, ka theksuar se nuk është pro grevës, por është pro kërkesës për pagë të dinjitetshme për punëtorët e sektorit publik.
“Kurti duhet ta lërë inatin, ta kuptojë se nuk ka të bëjë me Rrahman Jasharin, por ka të bëjë me 20 mijë mësimdhënës, të cilët kanë qenë pararojë e proceseve në vazhdimësi. E këshilloj Kurtin, se kjo kërkesë është minimale, habitem sa e kanë duru kurtin Sindikatat, nuk e kuptojë këtë logjikë të Kurtit”, ka thënë ai.
Ai ka thënë se Kurti, është dashur që moti të dërgoj në Kuvendin e Kosovës, Ligjin e Pagave. Ai e ka kritikuar kryeministrin e Kosovës, se e “ka mbajtur në sirtar”, Ligjin e Pagave.
Sipas tij, dalja nga kriza dhe ndërprerja e grevës do të bëhej shumë lehtë nëse kryeministri sipas tij do t’i kryente punët që i takojnë.