Kryetari i Aleancës për Ardhmërinë e Kosovës, Ramush Haradinaj, ka reaguar pas vdekjes së ish-senatorit amerikan nga Partia Demokratike, Joseph Lieberman, për të cilin ka thënë se ishte mbështetës i madh i shqiptarëve në përpjekjet për liri.
Me anë të një postimi në Facebook, Haradinaj ka thënë se Kosova ka humbur një nga miqtë e saj të shquar, i cili, sipas tij, ishte zë i fuqishëm i luftës së Kosovës.
“Kosova humbi një nga miqtë e saj të shquar, ish-senatorin amerikan nga Partia Demokratike Joseph Lieberman, mbështetës i madh i yni në përpjekjet për liri, zë i fuqishëm i luftës sonë të drejtë”, shkroi ai.
Haradinaj ka potencuar se shqiptarët do t’i jenë mirënjohës përjetë senatorit Lieberman, i cili së bashku me John McCain përkrahu presidentin Bill Clinton për intervenim kundër Serbisë, për ta parandaluar gjenocidin në Kosovë, fushatë e cila u ndërmor me sukses nga NATO e udhëhequr nga ShBA.