Lideri i Aleancës për Ardhmërinë e Kosovës (AAK), Ramush Haradinaj, ka reaguar pas vendimit të Shteteve të Bashkuara të Amerikës për ndërprerjen e dialogut strategjik me Kosovën. Ai e ka cilësuar këtë situatë si një nga momentet më të rënda për vendin.
“Kosova po i kalon ditët më të errëta në historinë e vet. Ka një kohë të gjatë që unë dhe Aleanca kemi tërhequr vërejtjet tona për sjelljet e papërgjegjshme dhe destruktive të Kurtit dhe qeverisë së tij. Ndërsa sot gjendemi në një situatë që nuk ka mundur të paramendohet për Kosovën”, ka shkruar Haradinaj.
Ai ka bërë thirrje për reflektim të menjëhershëm, duke kërkuar unitet politik dhe shoqëror përballë kësaj gjendjeje.
“I ftoj të gjitha forcat politike dhe gjithë shoqërinë kosovare që urgjentisht të reflektojmë për situatën në të cilën gjendemi”, ka shtuar ai.