Kryetari i Aleancës për Ardhmërinë e Kosovës, Ramush Haradinaj, është takuar me Përfaqësuesin Special të Bashkimit Evropian për Dialogun Kosovë-Serbi dhe çështje të tjera rajonale të Ballkanit Perëndimor, Miroslav Lajçak.
Gjatë këtij takimi, është diskutuar për dialogun mes Kosovës dhe Serbisë, dhe përkushtimin e Kosovës për një marrëveshje e cila si përfundim ka për qëllim njohjen reciproke.
Haradinaj ka theksuar nevojën e përfshirjes së SHBA-së në dialog.
“Në takim me Përfaqësuesin Special të BE-së për dialogun Kosovë – Serbi, z. Miroslav Lajčak, ripërsërita qëndrimet tona për dialogun, domosdoshmërinë e rolit strategjik të Shteteve të Bashkuara të Amerikës dhe përkushtimin tonë për një Marrëveshje Gjithëpërfshirëse ligjërisht të obligueshme, e cila ka epilog njohjen reciproke mes dy vendeve”, ka shkruar Haradinaj në Facebook.
Ai, po ashtu, ka thënë se gjatë këtij takimi e ka falënderuar për angazhimin e tij dhe të Bashkimit Evropian në këtë proces të rëndësishëm për Kosovën.
Ndërkaq, i dërguari i BE-së, të hënën është takuar me kryeministrin e Kosovës, Albin Kurti.
Në kuadër të vizitës së tij, ai ka takuar edhe kryetarin e Partisë Demokratike të Kosovës, Memli Krasniqin.
Lajçak planifikon të vizitojë edhe Prizrenin dhe veriun e Kosovës.
Ndër të tjera, në njoftim thuhet se “Fjalimi për media i emisarit Lajçak është planifikuar për të mërkurën e 29 qershorit.
Detajet do të ndahen me përfaqësuesit e mediave të martën e 28 qershorit”.