Kryetari i Aleancës për Ardhmërinë e Kosovës (AAK), Ramush Haradinaj, sot ka vizituar familjen Jashari.
Haradinaj ka thënë se liria dhe shteti ynë i ka rrënjët në Prekaz dhe se gatishmëria për sakrificë e dallojnë komandantin tonë, Adem Jashari dhe familjen e tij nga të gjitha etapat e kaluara të historisë sonë.
“Në prag të 16-vjetorit të Pavarësisë së Kosovës, kujtojmë e nderojmë gjithë anëtarët e kësaj familjeje, që shërbeu si shembulli më frymëzues i guximit për të luftuar për çlirimin dhe pavarësinë e Kosovës”, ka shkruar Haradinaj.
Kreu i AAK-së ka thënë se duhet të angazhohen në forcimin e shtetësisë, duke qenë në rresht me aleatët tanë në krye me ShBA, si anëtare e NATO-s.
“Para nderimeve të të rënëve për liri, u mirëpritëm nga i pari i kësaj familje emblematike, baca i shqiptarëve, Rifati. Si gjithmonë, plot jetë e pozitivitet, zemërgjerësi e dashuri për miqtë, luftëtarët e lirisë, Kosovën e kombin përgjithësisht. Kjo shtëpi e madhe e kombit, gjithmonë me dyer të hapura për miliona shqiptarë e miq ndërkombëtarë”, ka shkruar ai.