Ambasadori i Mbretërisë së Bashkuar në Kosovë, Jonathan Hargreaves, ka reaguar pas takimit me kryetarin e ri të Kuvendit, Dimal Basha.
Në njoftimin e tij, Hargreaves tha se kishte uruar kryeparlamentarin për zgjedhjen në detyrë, duke theksuar rëndësinë që Kuvendi të konstituohet plotësisht sa më shpejt, në respektim të vendimeve të Gjykatës Kushtetuese.
“Shpresojmë që situata të zgjidhet shpejt, në mënyrë që Kuvendi dhe një qeveri e re të mund të vazhdojnë punën jetike për të mirën e të gjithë qytetarëve të Kosovës”, u shpreh ambasadori britanik.
Ai shtoi se në takim është diskutuar edhe për rëndësinë e konsultimit të mirëfilltë me komunitetin serb të Kosovës, për të siguruar pjesëmarrjen e tyre të plotë në shoqëri, si dhe për një vizion të përbashkët për një Kosovë me mundësi për të gjithë.