Kryetarja e Kuvendit të Kosovës, Albulena Haxhiu, ka deklaruar se çështja e zgjedhjes së presidentit kërkon diskutime serioze ndërmjet subjekteve politike.
Ajo ka theksuar se nuk e ka mbyllur seancën e 5 marsit, por vetëm e ka ndërprerë atë, duke shtuar se ajo do të vazhdojë kur të krijohen kushtet e nevojshme.
Ajo ka shtuar se aktualisht nevojiten diskutime serioze politike dhe jo vetëm procedurale, nëse ekziston vullneti i vërtetë për zgjedhjen e presidentit.
Haxhiu ka thënë se kryeministri Albin Kurti ka kërkuar takime me subjektet politike, dhe se përpjekjet për dialog do të vazhdojnë, por nevojitet edhe vullnet nga të gjitha palët.
“Deri atëherë nevojiten diskutime serioze, pra jo në aspekte të tilla procedurale, por diskutime serioze nëse duam apo nuk duam përnjëmend ta zgjedhim presidentin. Për faktin se është e rëndësishme që ajo që thuhet në takime të mbyllura të jetë qëndrim real dhe jo vetëm diskutim sa për të thënë. Prandaj në këtë drejtim i ftoj të gjitha subjektet politike që të bëjnë përpjekje maksimale. Kryetari i Vetëvendosjes, kryeministri Kurti ka kërkuar takime me subjektet, ju e dini sepse kjo është bërë publike. Natyrisht që kërkesat për takime do të vazhdojnë, por në anën tjetër nevojitet edhe vullneti i palës tjetër”, ka deklaruar ajo para mediave.
Ajo ka përmendur se Grupi Parlamentar i Vetëvendosjes ka 66 vota, por ato nuk janë të mjaftueshme për zgjedhjen e presidentit, pasi kërkohen të paktën 80 vota në dy raundet e para.
Gjithashtu, ajo ka folur edhe për mbledhjen e Kryesisë së Kuvendit të thirrur për të hënën, duke thënë se në të do të trajtohen projektligje të rëndësishme, përfshirë marrëveshjet ndërkombëtare.
“Së pari unë kam thirrur një mbledhje të kryesisë së kuvendit për të trajtuar shumë projektligje që ndërlidhen me marrëveshjet ndërkombëtare dhe jo vetëm. Pra, në mbledhjen e kryesisë së kuvendit, për të cilën janë njoftuar edhe mediat, kemi shumë tema të rëndësishme që ndërlidhen me interesat e qytetarëve dhe vetë Republikës së Kosovës”, ka theksuar Haxhiu.