Deputeti i Partisë Demokratike të Kosovës (PDK), Bekim Haxhiu, ka deklaruar se testimi dhe ngjyrosja e urës së Ibrit kanë përfunduar, duke theksuar se tani është koha për veprim konkret nga Qeveria e Kosovës.
Ai ka kritikuar Qeverinë Kurti për mungesën e progresit në këtë çështje, pavarësisht rihapjes së diskutimeve për hapjen e urës për qarkullimin e automjeteve.
“Testimi i urës u kry, ngjyrosja po, tani është koha për veprim nga ana e Qeverisë, Ura e Ibrit të hapet edhe për kalim të automjeteve”, ka shkruar Haxhiu në Facebook.
Ndonëse ka kaluar një kohë që nga rihapja e diskutimeve për hapjen e urës, situata mbetet e pandryshuar, sipas Haxhiu, dhe se, automjetet ende nuk kanë qasje të lirë mbi urën që ndan qytetin e Mitrovicës.
Haxhiu ka theksuar se mos hapja e urës për qarkullimin e automjeteve do të përfaqësonte një kthim prapa në kohë.
“Po bëhen disa muaj që Qeveria Kurti ka rihapur temën e hapjes se Urës së Ibrit për qarkullim të automjeteve, por situata mbetët e pandryshuar.
Pas gjithë zhurmës së krijuar për Urën e Ibrit, tani mos hapja e saj për qarkullim të automjeteve do të thotë kthim prapa në vitin 1999/2000”, ka shtuar Haxhiu.
Deputeti i PDK-së, Bekim Haxhiu, ka bërë thirrje për veprim nga Qeveria Kurti lidhur për hapjen e urës së Ibrit për qarkullimin e automjeteve, duke theksuar se mos hapja e urës do të ishte një kthim prapa në vitet 1999/2000.