Ministrja e Drejtësisë, Albulena Haxhiu, ka deklaruar se nuk do të ketë asnjëherë bosnjëzim të Kosovës.
Ajo, në një intervistë për emisionin “Five” të RTV Dukagjinit, tha se në të kaluarën e kanë kundështuar marrëveshjen e vitit 2013-të, duke thënë se ajo përbën shtet brenda shtetit.
Sipas saj, formimin e Asociacionit e kishin ndalur sa ishin në opozitë me gaz lotsjellës.
“Nuk do të ketë marrëveshje që do ta bosnjëzojë Kosovën. E kemi kundërshtuar Zajednicën, marrëveshjen e 2013-tës, sepse gjashtë prej pikave kishin qëllim e krijimit e një entiteti serb që do të bëhej shtet brenda shtetit, me kompetenca ekzekutive. Falë protestave tona, qoftë jashtë apo brenda kuvendit përmes metodave si gazi lotsjellës, e kemi ndaluar atë marrëveshje të dëmshme”, tha ajo.
Ajo theksoi se qëndrimi i saj për Asociacionin nuk ka ndryshuar.
“Marrëveshja do të shkojë në Gjykatë Kushtetuese, ju e dini që Kushtetuesja marrëveshjen e vitit 2015 ka thënë se 23 nene janë shkelur të Kushtetues. Nuk do të ketë mekanizëm që do të shndërrohej në një shtet brenda shtetit. Qëndrimi është i njëjtë, edhe pse jemi në rrethana që drejtojmë qeverinë, kemi trashëguar marrëveshje mjaft të dëmshme”, tha ajo.