Ministrja e Drejtësisë në detyrë, Albulena Haxhiu, ka reaguar në lidhje me protestën gjithëpopullore që do të mbahet sot kundër Gjykatës Speciale, duke përmendur edhe qëndrimin e ish-ambasadorit holandez në Kosovë, Robert Bosch.
Përmes një postimi në Facebook, Haxhiu ka kujtuar se dikur Bosch kishte kërkuar dorëheqjen e saj, pasi ajo kishte refuzuar të lexonte në foltoren e Kuvendit rekomandimin e Komisionit për Legjislacion në favor të themelimit të Gjykatës Speciale.
“Më kujtohet sikur sot, kur në shenjë proteste unë kisha refuzuar të lexoj në foltoren e Kuvendit rekomandimin e Komisionit për Legjislacion që ishte në favor të themelimit të Gjykatës Speciale (sepse isha mbivotuar nga mazhoranca e asaj kohe), ky kishte kërkuar publikisht dorëheqjen time për atë veprim politik në foltoren e Kuvendit. Madje kemi pasur edhe një ballafaqim në një nga hapësirat e Kuvendit, i cili ishte bërë publik”, ka shkruar Haxhiu.
Ministrja në detyrë ka thënë se është mirë që Bosch sot po e kundërshton Specialen, por sipas saj, ky reagim ka ardhur me shumë vonesë.
“Shumë mirë, por me vonesë!”, ka theksuar Haxhiu në fund të reagimit të saj.