Nënkryetari i Lidhjes Demokratike të Kosovës, Lutfi Haziri, teksa ka kujtuar 15-vjetorin e ratifikimit të Kushtetutës së Republikës, aktit më të lartë juridik të shtetit, ka akuzuar Qeverinë për marrjen e vendimeve sipas të cilit janë kundër Kushtetutës.
Me anë të një postimi në Facebook, Haziri ka thënë se Qeveria aktuale nuk ka zbatuar një numër të vendimeve të Gjykatës Kushtetuese.
“Fatkeqësisht e kemi një Qeveri që brenda dy viteve ka nxjerrë vendime anti-kushtetuese në disa raste dhe kjo është tepër shqetësuese”.
Sipas tij, politikëbërësit duhet ta kenë Kushtetutën si udhërrëfyes për vlerat demokratike e parimet udhëheqëse.
“Ndërkaq qytetarëve u garantohet liria me të drejta të barabarta për secilin. Nuk e harrojmë thirrjen gjithëpopullore nga koha e rezistencës dhe kryengritjes politike: Republikë, Kushtetutë, ja me hatër ja me luftë”, shkroi ai.
Të dielën, janë bërë 15 vjet nga miratimi i Kushtetutës së Republikës së Kosovës.
Kushtetuta e Kosovës është ratifikuar më 9 prill 2008, ndërsa ka hyrë në fuqi më 15 qershor 2008.
Kushtetuta është akti më i lartë juridik, që garanton të drejtat dhe liritë themelore të të gjithë qytetarëve të vendit.
Në Kushtetutën e Kosovës një pjesë e madhe rrjedh nga Plani i Martti Ahtisaarit, duke u dhënë kështu të drejta specifike grupeve minoritare dhe një ambient më të sigurt për të gjithë qytetarët e Kosovës.
Kushtetuta e definon Kosovën si një shtet me pikëpamje neutrale ndaj fesë – neni 8, ka 14 kapituj dhe 162 nene.