Nënkryetari i Lidhjes Demokratike të Kosovës (LDK), Lutfi Haziri, ka kritikuar Lëvizjen Vetëvendosje dhe kryetarin Alban Hyseni se e ka shndërruar komunën e Gjilanit në çerdhe fëmijësh.
Përmes një postimi në Facebook, Haziri ka thënë se po bëhen dy vjet prej kur VV-ja vetëm po e “administron” Gjilanin, dhe sipas tij, nuk po e qeveris.
Ai shtoi se sipas matjeve të fundit, pakënaqësia e gjilanasve ndaj komunës është e madhe.
“Udhëheqja e Gjilanit e ka shndërruar komunën në çerdhe fëmijësh. Sipas matjeve të fundit, pakënaqësia e gjilanasve ndaj komunës është jashtëzakonisht e madhe. Projektet e vërteta të çerdheve ne i kemi lënë të gatshme. Pritni tash kur të dalin në inaugurim e të flasin për to. Projektet tjera zhvillimore kanë mbetur aty ku i kemi lënë para dy vitesh. Ku kanë prekur vetë, e kanë bërë lloç”, ka thënë Haziri.
Ai e ka kritikuar qeverisjen e VV-së për paaftësi, mungesë vizioni e bllokim të projekteve.
“Paaftësi, mungesë vizioni e bllokim të projekteve. Dështim monumental. Dy vite të humbura e fatkeqësisht duket se do të jetë mandat i humbur. Gjilani meriton më shumë dhe më mirë”, ka vijuar ai.