Ambasadori i ShBA-së, në Kosovë, Christopher Hill, ka deklaruar se është duke u biseduar për një takim të radhës në mes të kryeministrit të Kosovës, Albin Kurti dhe presidentint të Serbisë, Aleksandër Vuçiq.
Sipas tij, ky takim do të organizohet për “të sqaruar disa gjëra”, raporton mediumi serb N1.
Negociatat në Ohër më 18 mars, ku Kosova dhe Serbia, arritën një marrëveshje gojore për aneksin e zbatimit të marrëveshjes për rrugën drejt normalizimit të marrëdhënieve, ambasadori, Hill i vlerësoi si “shumë të suksesshme”.
Por sipas tij, do të ishte mirë të shiheshin disa gjëra më konkrete.
“Mendoj se kanë bërë përparim. Do të doja të shihja disa gjëra më konkrete, por mendoj se po ecim shumë qartë drejt zbatimit të këtij procesi të dialogut. Duhet ende shumë për të bërë, veçanërisht në artikulimin se si do të duket ZSO, kjo është një çështje kyçe”, tha ai.
Ai tha se gjëja më e rëndësishme për SHBA-në në Ballkanin Perëndimor janë marrëdhëniet e mira ndërmjet shteteve dhe shtoi se Uashingtoni për këtë arsye e mbështet fuqishëm nismën e Ballkanit të Hapur, si dhe të gjitha iniciativat e tjera rajonale.