Deputeti i LDK-së, Avdullah Hoti, e ka kritikuar Qeverinë e Kosovës, për mosndarjen e mjeteve për familjet të cilat janë prekur nga vërshimet e fundit.
Hoti ka thënë se në mbledhjen e fundit të Qeverisë, është dashur të ndahen të holla për komunat të cilat kanë pësuar dëme nga vërshimet.
“Vërshimet – ende asnjë cent nuk është ndarë ende nga Qeveria për familjet e prekura. Shumë vendime qenkan marrë në mbledhjen e Qeverisë sot, por asnjë cent nuk qenka ndarë për kompensimin e familjeve që pësuan nga vërshimet në Skënderaj, Klinë, Istog, Mitrovicë e komuna të tjera. Rezerva shtetërore është për situata kur ndodhin shpenzime të paparashikuara”, ka thënë ai.
Deputeti i LDK-së, ka kërkuar nga ekzekutivi t’u sigurojë familjeve që kanë pësuar nga vërshimet shporet, frigorifer, shtrat, tepihë dhe ushqime bazike.
“Ftoj Qeverinë tu ndajë këtyre familjeve menjëherë një shumë fikse për gjërat elementare të jetës: shporet, frigorifer, shtrat, tepihë dhe ushqime bazike. Disa familje kanë humbur edhe rrobat e trupit. Ka familje me të moshuar e fëmijë shumë të vegjël, të cilët nuk mund të kthehen në shtëpitë e vërshuara pa u meremetuar plotësisht. Asnjë meremetim nuk mund të bëhet në këto kushte atmosferike”, ka thënë ai.
Vërshimet e fundit në disa komuna vlerësohet të kenë shkaktuar dëme milionëshe.