Deputeti i Lidhjes Demokratike të Kosovës (LDK), Avdullah Hoti, ka thënë se qeveria aktuale i ka bërë “dëm të madh dhe afatgjatë” integrimit euroatlantik të Kosovës.
Sipas Hotit, kjo është bërë “duke na kurthuar” në në një marrëveshje, që sipas tij, nuk parasheh njohjen dhe e liron Serbinë nga ky obligim në progresin e saj drejt BE-së.
Deputeti nga radhët e LDK-së është shprehur se qeveria aktuale në fillim të mandatit “e braktisi” dialogun për njohje reciproke.
“-Vendosi kushte për dialog, të cilat nuk u morën parasysh as nga ndërmjetësi i BE-së e as nga aleatët;
– E nisi dialogun pa kushte;
– E pranoi marrëveshjen e Brukselit/Ohrit, e cila në qendër nuk e ka njohje reciproke, por i ka garancitë për vetëmenaxhim për komunitetin serb dhe kishën ortodokse serbe;
– Në nëntor 2023 e pranoi nga BE-ja draftstatutin e asociacionit, të cilin nuk e refuzoi”, ka shkruar ai.
Hoti ka thënë tutje se tashmë e njëjta qeveri “çuditet” pse dërgimi i atij drafti në Gjykatën Kushtetuese po i vendoset si kusht për anëtarësim në Këshillin e Evropës.