Ministrja e Punëve të Jashtme të Kosovës, Donika Gërvalla së bashku me ambasadorin e ShBA-së në Kosovë, Jeff Hovenier, kanë uruar diplomatin e ri, Anell Bajra, i cili do të shërbejë për një vit të plotë në Departamentin e Shtetit në Washington, mundësi kjo në kuadër të marrëveshjes së përbashkët mes Ministrisë së Punëve të Jashtme dhe Diasporës dhe Departamentit të Shtetit në Shtetet e Bashkuara të Amerikës.
Ata i kanë uruar diplomatit kosovar një vit të suksesshëm në Byronë e Çështjeve të Arsimit dhe Kulturës në Departamentin e Shtetit.
Sipas njoftimit të MPDJ-së, në vendin e diplomacisë dhe demokracisë, Kosova do të përfaqësohet me një kuadër të ri dhe premtues i cili pa dyshim, nga kjo eksperiencë, do të sjellë përvojat më të mira në institucionet e të dy vendeve.
“Kosova do të mbetet aleatja më e ngushtë e Shteteve të Bashkuara të Amerikës, me një raport të fort dhe të pakontestueshëm. Thellimi i bashkëpunimit dhe marrëveshjet si kjo, fuqizojnë më tej partneritetin e ngushtë ndërmjet diplomatëve dhe diplomacisë”.
Ndryshe, të hënën e 19 dhjetorit, ambasadori i ShBA-së në Kosovë, Hovenier përgjatë takimit me ministren Gërvalla e diplomatin kosovar ka theksuar se lidhjet e forta mes shteteve mbështesin partneritetin e zyrave të marrëdhënieve të jashtme në këtë shkëmbim.