Në darkën zyrtare të organizuar nga FIFA për Kupën e Botës për Klube, që u mbajt në Shtetet e Bashkuara të Amerikës, Kosova u përfaqësua nga presidentja Vjosa Osmani.
Sipas njoftimit të Presidencës, Osmani pati ftesë nga Presidenti i FIFA-s, Gianni Infantino.
Megjithatë, i pranishëm nuk ishte kryetari i Federatës së Futbollit të Kosovës, Agim Ademi.
Ish-avokati i FFK-së, Taulant Hodaj, ka pretenduar se Ademi e ka të ndaluar të udhëtojë në SHBA.
Këtë pretendim të Hodajt, e ka mohuar Ademi në një bisedë telefonike për televizionin Dukagjini.
“Jo bre s’merrna me atë temë. S’janë këto tema, nuk merrna une me bo klikime. S’jom për klikime të thashë. S’kom kurrfarë ndalese une”, ka thënë Ademi.
Ndërkohë, i kontaktuar nga televizioni, Hodaj nuk ka pranuar të flasë më shumë për këtë çështje.
Ai shkurtimisht ka thënë se nuk çka të shtoj ndonjë gjë tjetër për këtë temë, përveç asaj që e ka thënë mbrëmë në televizionin Kanal 10.
“Zotit Ademi nuk i lejohet nga autoritetet amerikane të udhëtoj në SHBA, përkundër shumë përpjekjeve që bën në vazhdimësi për të shkuar atje”, ka thënë Hodaj.
Agim Ademi është kryetar i Federatës së Futbollit të Kosovës që nga viti 2018.
Në vitin 2022, ai e fitoi mandatin e tij të dytë katërvjeçar për të udhëhequr me shtëpinë e futbollit kosovar.