Të hënën e 22 gushtit, në pikën kufitare në Vërmicë, oficerët doganorë kanë ndaluar një automjet me targa të Kosovës, në të cilin pas kontrollit, në çantën e krahut të njërit prej pasagjerëve i janë gjetur 18 mijë e 250 euro, të cilat dyshohen të jenë të padeklaruara.
Sipas njoftimit, në makinë ishin të pranishëm shoferi dhe pasagjerët, të cilët ishin deklaruar se nuk posedojnë asgjë.
“Automjeti është dërguar në vijën e dytë të kontrollit nën asistimin e policisë ku pas ekzaminimit fizik, te njëri nga pasagjerët në trup (saktësisht në çantën e krahut) janë gjetur 18250.00 euro të padeklaruara”, thuhet në njoftimin e Doganës.
Po ashtu është bërë e ditur se pala përgjegjëse është gjobitur me 25 për qind të vlerës totale, konform nenit 33.5 të KDAK-ës, ndërsa pjesa tjetër është ndaluar deri në përfundimin e procedurave hetimore.
Dogana e Kosovës ka njoftuar se e ka aplikacionin eDogana për pajisjet e mençura android dhe ios, i cili mundëson lajmërim të parregullsive dhe sjelljeve joprofesionale me komunikim të sigurt.
Po ashtu, ofron shërbime të tjera me qëllim të shërbimit ndaj qytetarëve dhe komunitetit të prodhuesve dhe tregtisë në përgjithësi.