Njohësi i çështjeve të sigurisë Nuredin Ibishi ka folur në FIVE lidhur me pajisjen e Forcat e Sigurisë së Kosovës(FSK) me sistemin raketor turk antitank OMTAS, duke theksuar se ky sistem ka shumë ngjashmëri me FGM-148 Javelin.
Sipas Ibishit, bëhet fjalë për armë anti-blind të gjeneratës së fundit, ku dallimet kryesore lidhen me origjinën dhe disa elemente teknike, por jo me parimin e funksionimit.
“Këto armë anti-blind janë të gjeneratës së fundit, prodhuesi ndoshta ndryshon për shkak të origjinës dhe disa çështjeve teknike më tepër, përndryshe principi është i njëjtë. Edhe Turqia është një prodhues i madh i armatimit të gjeneratës së fundit, si me dronë edhe me të tjera, por edhe të sistemit anti-blind sikurse që është OMTAS. Ka shumë ngjashmëri me Javelin-in, përafërsisht në principe të njëjta vepron, ndërsa dallon në peshë, në sistemin e udhëheqjes dhe në disa detaje shumë të vogla”, ka thënë ai.
Ibishi ka shtuar se blerja e këtij sistemi nuk nënkupton ndryshim strategjik në orientimin ushtarak të Kosovës, por lidhet kryesisht me procedurat e furnizimit.
“Procedurat janë më të ndërlikuara me Shtetet e Bashkuara të Amerikës dhe aty është një procedurë pak më e gjatë, e dimë kur e kemi porositur Javelin-in dhe kur është marrë vesh në Departamentin e Shtetit dhe në nivele të tjera ushtarake. Turqia menjëherë është deklaruar për çështje të pajisjeve të armatimit dhe kjo e ka shqetësuar edhe Serbinë, se kjo porosi e menjëhershme ka ardhur më herët. Kemi privilegjin që shteti i dytë menjëherë pas Turqisë ta demonstrojmë këtë apo të shihet në një stërvitje të nivelit të tillë sikurse që ishte Defender Europe”, ka deklaruar Ibishi.