Inspektimi i pikave të shitjes së karburanteve po vazhdon nga ana e Inspektoratit të Tregut, në mbrojtje të konsumatorëve.
Me anë të një postimi në Facebook, Ministria e Industrisë, Ndërmarrësisë dhe Tregtisë (MINT) ka njoftuar se është duke u realizuar verifikimi i sasisë së derivateve.
“Inspektorati i Tregut, në kuadër të Ministrisë së Industrisë, Ndërmarrësisë dhe Tregtisë, në bashkëpunim me zyrtarët e Agjencisë të Metrologjisë së Kosovës, kanë vazhduar verifikimin e sasisë nëpër pikat e shitjes së derivateve të naftës, me qëllim të parandalimit të çfarëdo mashtrimi që mund të bëhet me sasinë e deklaruar. Përmes etalonëve të kalibruar, nga inxhinierët e metrologjisë, bëhen matjet e duhura me anë të të cilave vërtetohet nëse litri i deklaruar ka sasinë e saktë. Në rastet kur ka devijime, Inspektorati i Tregut ndërmerr masat e duhura ndëshkuese ndaj subjekteve që kanë mashtruar konsumatorët”, thuhet në njoftim.
Tutje, Inspektorati i Tregut ka njoftuar se do të vazhdojë mbikëqyrjen e tregut. Ai i inkurajon qytetarët të njoftojnë parregullsitë.
“Inspektorati i Tregut, do të vijojë të mbikëqyrë tregun me intensitet të shtuar dhe të trajtojë secilën nga ankesat e konsumatorëve, për çfarë edhe i inkurajon ata që të paraqesin parregullsitë që hasin.”, thuhet në njoftim.