Ish-komandanti i Ushtrisë Çlirimtare të Kosovës (UÇK) dhe nënkryetari i Komunës së Skenderajt, Sami Lushtaku, është ndaluar nga policia e Gjykatës Speciale në mbrëmjen e së premtes së 8 marsit.
Ai ishte dërguar në zyrat e EULEX-it në Fushë-Kosovë.
Pas intervistimit, Sami Lushtaku u lirua.
Avokati i tij, Artan Qerkini, ka konfirmuar se Lushtakut i është konfiskuar telefoni.
“Ky veprim bie ndesh me ligjin. Sami Lushtaku nuk e ka statusin e të dyshuarit, prandaj atij i është cenuar privatësia pasi i është marrë telefoni”, ka thënë avokati, duke paralajmëruar ankesë në DHSK.
Ndërsa, Zyra e Prokurorit të Specializuar në lidhje me këtë çështje duke mos dhënë detaje kanë thënë se “ZPS-ja është duke kryer operacione të vazhdueshme.”
Gjykata Speciale ka pasur aksion të tillë edhe të enjten, ku u bastis shtëpia e ish-komandantit të Shtabit të Përgjithshëm të UÇK-së, Sylejman Selimi.
Lexo edhe: Specialja bastis shtëpinë e Sylejman Selimit
Artan Qerkini, avokat i Selimit, ka konfirmuar se bastisja u krye nën dyshimin se ka prova për pengim të administrimit të drejtësisë, por që klienti i tij nuk e ka statusin e personit të dyshuar.
Avokati Qerkini u ankua për shkelje të të drejtave kushtetuese të Selimit.