Ushtria izraelite ka njoftuar se Irani ka lëshuar disa raketa drejt territorit të Izraelit në orët e para të së enjtes.
Sipas shërbimeve emergjente, të cituara nga AFP, deri më tani nuk ka raportime për viktima.
Brenda dy orësh u lëshuan tre alarme të veçanta ajrore.
Gazetarë të Agence France-Presse raportuan se kanë dëgjuar shpërthime në Jerusalem, ndërsa më vonë ushtria izraelite njoftoi se qytetarët mund të largohen nga strehimoret.
Më herët, ushtria izraelite njoftoi se ka nisur një “valë të re sulmesh” që synonin infrastrukturën ushtarake në Teheran.
Sekretari amerikan i Mbrojtjes, Pete Hegseth, konfirmoi se një nëndetëse amerikane ka fundosur një anije luftarake iraniane në Oqeanin Indian.
Pentagoni publikoi pamje nga momenti i sulmit.
Rreth 180 persona besohet se ndodheshin në bordin e anijes Iris Dena.
Deri më tani janë shpëtuar 32 persona, ndërsa autoritetet e Sri Lankës bëjnë të ditur se janë gjetur 80 trupa të pajetë.
Qytetarë iranianë i kanë thënë BBC-së se kryeqyteti Teheran “ndihet i zbrazët” dhe se ata “meritojnë një jetë normale”.
Ndërkohë, Sekretari amerikan i Shtetit, Marco Rubio, zhvilloi një bisedë telefonike me ministrin e Jashtëm të Arabisë Saudite, Faisal bin Farhan Al Saud.
Sipas zëdhënësit të Rubios, ai shprehu mirënjohje për reagimin e Arabisë Saudite pas sulmit ndaj ambasadës amerikane në Riad.
Të martën, Ministria e Jashtme saudite dënoi sulmin iranian ndaj ndërtesës së ambasadës së SHBA-së.
Gjatë bisedës, dy zyrtarët diskutuan gjithashtu për kërcënimet që, sipas tyre, regjimi iranian paraqet për stabilitetin rajonal, si dhe për zhvillimet e fundit në Lindjen e Mesme.