Andrew Mountbatten-Windsor duhet të japë dëshmi për atë që di rreth Jeffrey Epstein, ka deklaruar një avokate e njohur që përfaqëson disa nga viktimat e abuzuesit seksual amerikan.
“Ende nuk është vonë dhe ai ka informacione që mund t’i ndajë,” ka thënë për BBC-në Gloria Allred.
Megjithatë, email-e të publikuara së fundmi nga Departamenti Amerikan i Drejtësisë tregojnë se autoritetet amerikane kishin bërë tashmë disa përpjekje që Princi Andrew të bashkëpunonte në hetimet për Epstein-in, përfshirë edhe një kërkesë formale drejtuar Ministrisë së Brendshme britanike në vitin 2020.
Sipas burimeve mbretërore, ka pasur edhe thirrje nga brenda rrethit mbretëror: “Kushdo që ka informacion duhet të konsiderojë ndihmën ndaj çdo hetimi, por kjo në fund mbetet çështje e Andrew Mountbatten-Windsor dhe e ndërgjegjes së tij.”
Allred ka ngritur pyetjen pse Andrew ishte i gatshëm të fliste për një orë në një intervistë televizive për BBC-në, por nuk ka pranuar të flasë me autoritetet ligjzbatuese. Ajo iu referua intervistës famëkeqe të vitit 2019 në emisionin Newsnight me Emily Maitlis.
“Ai nuk është ai që duhet të vendosë nëse ka apo jo informacione që mund të ndihmojnë hetimin,” tha Allred.
Deklaratat e saj pasojnë komentet e kryeministrit britanik Sir Keir Starmer, i cili ka thënë se kushdo që ka informacion duhet të jetë i gatshëm ta ndajë atë.
“Nuk mund të thuash se je në anën e viktimave, nëse nuk je i gatshëm ta bësh këtë,” u shpreh Starmer.
Sipas burimeve mbretërore, mungesa e një deklarate zyrtare nga Buckingham Palace nuk duhet të shihet si neglizhencë. Ndihmësit mbretërorë thuhet se e kuptojnë plotësisht shqetësimin publik dhe po monitorojnë dokumentet që po publikohen, edhe pse Pallati nuk merr njoftime paraprake për këto publikime.
Qëndrimi zyrtar i Buckingham Palace mbetet se Mbreti dhe Mbretëresha kanë pasur dhe do të kenë gjithmonë “mendimet dhe solidaritetin më të thellë me viktimat dhe të mbijetuarit e çdo forme abuzimi”.
Deri më tani, Princi Andrew nuk ka dhënë asnjë shenjë se do të dëshmojë. Ai ka mohuar vazhdimisht çdo keqbërje.
Vjeshtën e kaluar, demokratët në Kongresin amerikan kishin vendosur një afat në muajin nëntor që Andrew të dëshmonte për njohuritë e tij mbi Epstein-in, por ai nuk reagoi, raporton BBC.
Email-et e fundit tregojnë përpjekjet e vazhdueshme të autoriteteve amerikane në fillim të vitit 2020 për të caktuar një kohë dhe vend për dëshminë e tij, qoftë në Mbretërinë e Bashkuar apo në SHBA. Megjithatë, shkëmbimet e ftohta mes avokatëve nuk sollën përparim, pavarësisht deklaratave publike të Andrew se ishte i gatshëm të bashkëpunonte.
Në një moment, Departamenti Amerikan i Drejtësisë shprehu zhgënjim, duke thënë se përpjekjet për një intervistë vullnetare kishin “shteruar”.
Kjo e detyroi SHBA-në të nisë procedurën e ndihmës juridike të ndërsjellë, duke i kërkuar zyrtarisht Mbretërisë së Bashkuar bashkëpunim për të detyruar dëshminë e Andrew. Kërkesa iu dorëzua Ministrisë së Brendshme në prill të vitit 2020, në kulmin e pandemisë së Covid-19 në Londër.
Situata u ndërlikua më tej në vitin 2021, kur Virginia Giuffre ngriti një padi civile kundër Andrew në SHBA, duke e akuzuar për abuzim seksual. Kjo e ktheu atë nga dëshmitar në të pandehur, duke vështirësuar çdo kërkesë për dëshmi gjatë procesit gjyqësor.
Rasti u mbyll jashtë gjykate në vitin 2022. Princi Andrew mohoi akuzat dhe nuk dha asnjë dëshmi.