“Javën e Pavarësisë e përmbylla në Hagë, aty ku çlirimtarët e Kosovës po zhvillojnë betejën e tyre të fundit për të vërtetën e luftës së drejtë të popullit tonë për liri e pavarësi.”
Kështu ka deklaruar i pari PDK-së, Memli Krasniqi, duke theksuar se shënimi i 15 vjetorit të shpalljes së Pavarësisë së Kosovës “nuk mund të ishte i plotë pa i uruar ata që tërë jetën punuan e sakrifikuan për lirinë që e gëzojmë sot dhe që ngritën themelet e shtetit tonë – Hashim Thaçin dhe Kadri Veselin”.
Krasniqi bëri të ditur se duke rikujtuar momentin dhe emocionet e 17 shkurtit 2008, dhe aspiratat që kanë përmbushur ka uruar që Hashim Thaçi e Kadri Veseli, Jakup Krasniqi e Rexhep Selimi dhe të gjithë çlirimtarët e tjerë t’i kemi në Kosovë në festat e ardhshme, si triumfues e fitimtarë.
“Përherë falënderues për kontributin e tyre të pashoq për Kosovën”, ka përfunduar postim e tij në Facebook Krasniqi.