Analisti Vehbi Kajtazi ka thënë se kryeministri i Kosovës, Albin Kurti, kishte marrë pjesë në zgjedhje dhe në protesta në Shqipëri, me qëllimin e vetëm që ta rrëzonte kryeministrin e Shqipërisë, Edi Ramën.
Sipas tij, meqë Kurti kishte provuar që ta rrëzojë Ramën në mënyrë ligjore, edhe Edi Rama ka të drejtë kushtimisht që ta rrëzojë Albin Kurtin.
“Nuk besoj që kryeministri, Edi Rama nuk ka për qëllim që ta rrëzojë Kurtin, por nëse do ta kishte për mua është tepër legjitime” ka thënë Kajtazi në “Debat Plus” me Ermal Pandurin në RTV Dukagjini.
Tutje, ai ka thënë se arsyeja pse kryeministri Rama nuk ka një qëllim të tillë, është se Ramës i nevojiten kundërshtarë që të tregojë që është më i mençur se ta. Sipas tij, Rama është duke luajtur me Kurtin.
“Kryeministrin Kurti, Rama e ka bërë për pesë pare, sepse shkon dhe i viziton familjen e Hashim Thaçit, kurse nga krerët e shtetit të Kosovës askush nuk ka qenë”, ka theksuar ai.
Sipas Kajtazit, Rama është duke i joshur edhe biznesmenët që të investojnë në Shqipëri, kurse në konferencë për media, ky i fundit është tallur me kryeministrin Kurti, duke thënë se Kurtin mund ta rrëzojë vetëm Kurti.
Ndërkaq, ai ka thënë se gjithçka që është raportuar në media do të ishte legjitime, pasi Kurti ka qenë i pari që i kishte shpallur luftë Ramës.