Avokati Naim Rudari ka bërë të ditur se në lidhje me rastin “Banjska” është bërë kallëzim penal ndaj disa personave që kanë ndihmuar grupin terrorist të strehohet dhe të largohet nga fshati Bajnskë.
Më 22 dhe 24 korrik 2025, dy dëshmitarë kyç janë ftuar në gjykatë, por sipas Rudarit, ata kanë dhënë deklarata të rrejshme duke mbrojtur kriminelët dhe duke mohuar deklaratat e mëparshme që kishin dhënë në polici dhe prokurori.
Dëshmitarët në fjalë, thekson avokati, janë përfshirë në ndihmën ndaj terroristëve duke i prezantuar si punëtorë të hotelit “Rajnska Banja”, duke i lejuar të marrin ndihmë për plagët dhe më pas t’i ndërronin rrobat për t’u larguar të lirë.
Ai në një postim në Facebook, kërkon nga Prokuroria e Kosovës që të nisë hetimet sa më shpejt për të siguruar prova shtesë dhe për të sjellë drejtësi për familjen Bunjaku, zyrtarin policor Alban Rashiti dhe të gjithë qytetarët e Kosovës, duke u përballur me veprimtaritë terroriste që kanë sulmuar rendin juridik të vendit.
