Kanë kaluar më shumë se pesë orë qëkur takimi në Bruksel në mes të shefit të diplomacisë evropiane, Josep Borrell, përfaqësuesit të BE-së për dialogun, Miroslav Lajçak, kryeministrit të Kosovës, Albin Kurti dhe presidentit të Serbisë, Aleksandër Vuçiq në kuadër të dialogut Kosovë-Serbi ka filluar.
Para nisjes së takimit nga Bashkimi Evropian janë publikuar pamjet ku shihen liderët e të dy vendeve dhe kryediplomati Borrell së bashku me emisarin Lajçak.
Fillimisht, Borrell kishte mbajtur takim me kryeministrin Kurti, pastaj me presidentin Vuçiq.
Bashkë me Kurtin, ishte edhe ministrja e Punëve të Jashtme dhe Diasporës, Donika Gërvalla.
Kurti para takimit trepalësh, fillimisht është pritur nga Lajçak dhe më pas nga Borrell.
Pas takimit me Kurtin, Borrell pastaj është takuar me presidentin serb, Vuçiq.
Borrell tha mbrëmë se e ka thirrur këtë “takim urgjent”, për shkak të nevojës për të shtensionuar situatën.
“T’i japim fund menaxhimit të krizave të vazhdueshme dhe në vend të kësaj të fillojmë të përparojmë drejt normalizimit të marrëdhënieve”, ka shkruar ai në Twitter.
Ky takim ndodh pikërisht në ditën kur ishte paraparë të fillojë faza e dytë e zbatimit të vendimit të Qeverisë së Kosovës për konvertimin e targave ilegale.
Sipas një komunikate për media nga BE-ja, thuhet se fokusi i takimit urgjent do të jetë gjetja e një rrugëdaljeje nga kriza aktuale dhe shmangia e çdo përshkallëzimi dhe tensioni të mëtejshëm në terren, me theks në targat dhe kthimin e serbëve të Kosovës në institucionet e Kosovës.