Deputeti i vetëm shqiptar në Parlamentin e Serbisë, Shaip Kamberi, ka reaguar sot me rastin e 10 dhjetorit, Ditës Ndërkombëtare të të Drejtave të Njeriut, duke theksuar se për shqiptarët e Luginës së Preshevës këto të drejta mbeten ende larg realizimit.
Në një postim në Facebook, Kamberi ka thënë se respektimi i të drejtave të njeriut nuk mund të mbetet vetëm në nivel deklarativ, por duhet të kthehet në politika konkrete dhe veprime të matshme.
Sipas tij, shqiptarët në Preshevë, Bujanoc dhe Medvegjë vazhdojnë të përjetojnë “diskriminim sistematik”, duke përmendur mungesën e përfaqësimit të drejtë institucional, pasivizimin administrativ, mungesën e investimeve, mosnjohjen e diplomave dhe presionin e vazhdueshëm mbi të drejtat civile, kombëtare e socio-ekonomike.