Sekretarja e Sigurisë Kombëtare të SHBA-së, Kristi Noem, ka njoftuar se departamenti i saj po vendos kamera të trupit për çdo oficer në terren në Minneapolis, me efekt të menjëhershëm, dhe se programi do të zgjerohet në nivel kombëtar sapo të sigurohen fondet e nevojshme.
“Me efekt të menjëhershëm po vendosim kamera të trupit për çdo oficer në terren në Minneapolis. Sapo të ketë fonde, programi do të zgjerohet në të gjithë vendin”, shkroi Noem në platformën X.
Politikat e zbatimit të emigracionit të administratës së presidentit Donald Trump janë vënë nën shqyrtim pas vrasjes së dy qytetarëve amerikanë në Minnesota muajin e kaluar nga agjentë të Agjencisë për Imigrim dhe Dogana (ICE), e cila është pjesë e Departamentit të Sigurisë Kombëtare.
Këto vrasje kanë nxitur protesta në mbarë vendin.
Avokatët e të drejtave të njeriut kanë dënuar gjerësisht politikat e emigracionit të Trumpit, duke thënë se ato mungojnë në proces të rregullt ligjor dhe krijojnë një mjedis armiqësor për komunitetet e emigrantëve.
Trump i ka paraqitur veprimet e tij si masa për përmirësimin e sigurisë së brendshme.
Trump komentoi gjithashtu njoftimin e Noem të hënën, duke u thënë gazetarëve se kamerat e trupit “në përgjithësi janë të mira për zbatimin e ligjit, sepse njerëzit nuk mund të gënjejnë për atë që po ndodh”, raporton Reuters.
“Pra, në përgjithësi, mendoj se në 80% të rasteve janë të mira për zbatimin e ligjit. Por nëse ajo dëshiron ta bëjë këtë, unë jam dakord”, tha Trump, duke shtuar se vendimi ishte marrë nga Noem dhe jo prej tij.
Njoftimi i Noem erdhi pas një telefonate që ajo pati me Komisionerin e Doganave dhe Mbrojtjes së Kufirit të SHBA-së Rodney Scott, “czarin” e kufirit të Trumpit Tom Homan, i cili është ngarkuar me marrjen nën kontroll të operacioneve në Minnesota, si dhe me drejtorin në detyrë të ICE, Todd Lyons.
Noem tha se administrata Trump do të “sigurojë dhe vendosë me shpejtësi kamera të trupit për forcat e zbatimit të ligjit të DHS-së në mbarë vendin”.