Në funksion hyri, por jo për qytetarët.
Këtë të martë, autobusët e Trafikut Urban u shfrytëzuan si mjet proteste nga përfaqësuesit e sindikatës së kësaj ndërmarrjeje, të cilët kërkojnë ekzekutimin e pagesave nga Komuna e Prishtinës.
Njëjtë vepruan edhe përfaqësuesit e sindikatës së operatorëve privatë, duke shkaktuar kolona të gjata në kryeqytet.
Kjo ishte arsyeja kryesore pse Policia e Kosovës kërkonte largimin e menjëhershëm të autobusëve nga rruga.
Sipas përfaqësuesve të protestuesve, situata për ta është bërë e papërballueshme.
“Shpenzimet e naftës i kemi borxh 1 milion euro. Punëtorëve u kemi borxh 800 mijë euro për dy rroga. Në total borxhi arrin 1 milion e 600 mijë euro”, ka thënë, Ilmi Gashi, kryetar i Sindikatës së Trafikut Urban.
Ndërkohë, sekretari i Shoqatës së Operatorëve Privatë, Ismet Haliti, njoftoi se nga nesër protesta do të marrë formë tjetër.
“Nga nesër protestën do ta mbajmë mes Qeverisë dhe Komunës. Tek ne borxhi është edhe më i madh se te ‘Trafiku Urban’”, ka thçnë Haliti.
Me të shënuar ora 11:00, përfaqësuesit e protestës u dakorduan që autobusët të largohen nga rruga.
Pikërisht për këtë situatë, kryetari i Prishtinës, Përparim Rama, priti sërish në takim përfaqësuesit e sindikatave të Trafikut Urban dhe të operatorëve privatë.
Pas takimit, ai përsëriti se përgjegjësia qëndron tek Ministria e Financave.
Në një konferencë për media, Rama dha edhe detaje për seancën e jashtëzakonshme të thirrur për të enjten, duke theksuar se mbledhja nuk është e jashtëligjshme.
Por të njëjtin mendim nuk ndanë drejtoresha ekzekutive e INPO-s, Albulena Nrecaj.
“Është e jashtëligjshme, sepse as ky Kuvend e as kryetari nuk kanë mandat ligjor të bëjnë një gjë të tillë”, ka thënë Nrecaj.
Protesta pritet të vazhdojë edhe të mërkurën, duke filluar nga ora 09:00 e mëngjesit.