Asociacioni i Gazetarëve të Kosovës (AGK), ka bërë të ditur se gazetari i Vox Kosova, Valon Rashiti, ka marrë një kërcënim serioz nga udhëheqësi i tifozëve të Kombëtares së Kosovës, Lulzim Berisha.
Sipas Rashitit, gjatë një ceremonie Berisha i ka thënë: “Kam me të ngreh zhag, ka me të shky si zhabën”.
AGK-ja e dënon fuqishëm këtë kërcënim publik, duke theksuar se cenon integritetin fizik të gazetarit dhe pengon punën e tij profesionale.
AGK-ja njofton se do të monitorojë denoncimin që Rashiti e ka bërë pranë organeve të sigurisë dhe drejtësisë.
Po ashtu, AGK-ja fton Federatën e Futbollit të Kosovës që të distancohet qartë nga kjo sjellje e papranueshme.