Prokuroria Themelore në Ferizaj ka bërë të ditur se ka paraqitur kërkesë në Gjykatën Themelore të këtij qyteti për caktimin e masës së paraburgimit prej 30 ditësh ndaj gjashtë personave të dyshuar për një vrasje të rëndë që ndodhi më 1 prill në Kaçanik.
Sipas njoftimit të dyshuarit H.B., R.M., V.Ç., E.L., Sh.K., dhe D.G., të gjithë nga komuna e Kaçanikut, sipas Prokurorisë dyshohet se kanë planifikuar dhe ekzekutuar në bashkëkryerje vrasjen e rreshterit të policisë M.L., i cili shërbente në Stacionin Policor të Kaçanikut.
Ngjarja ndodhi rreth orës 23:00 në rrugën “Idriz Seferi”, në katin e dytë të hyrjes së një ndërtese banimi, ku viktima po kthehej në banesën e tij pas përfundimit të orarit të punës. Sipas hetimeve fillestare, M.L. ishte ndjekur nga të dyshuarit dhe në momentin kur po hynte në objektin e banimit, një i mitur i përfshirë në rast e ka qëlluar me armë zjarri. Në vendin e ngjarjes janë gjetur katër gëzhoja të kalibrit 9.19 mm, ndërsa viktima ka ndërruar jetë si pasojë e plagëve të marra.
Prokuroria njofton se ekziston dyshimi i bazuar se të pandehurit, duke vepruar me qëllim dhe me përgatitje të mëhershme, kanë kryer veprën penale “Vrasje e rëndë” nga neni 173 paragrafi 1, nënparagrafi 1.9, në lidhje me nenin 31 të Kodit Penal të Republikës së Kosovës.
Të dyshuarit aktualisht ndodhen nën masën e ndalimit 48 orësh me vendim të Prokurorit të Shtetit, ndërsa Prokuroria ka kërkuar që ndaj tyre të caktohet masa e paraburgimit për një periudhë prej 30 ditësh, në pritje të zhvillimeve të mëtejshme hetimore.
“Prokuroria Themelore në Ferizaj, njofton opinionin publik se ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj të dyshuarve: H.B., R.M., V.Ç., E.L., Sh.K., dhe D.G.- komuna Kaçanik, për shkak të dyshimit të veprës penale “Vrasja e rëndë” sipas Kodit Penal të Republikës së Kosovës.
Sipas Prokurorisë, ekziston dyshimi i bazuar se me datë 01.04.2025, rreth orës 23:00, në Kaçanik, në rrugën “Idriz Seferi”, përkatësisht në katin e II-të të hyrjes së ndërtesës, të pandehurit duke vepruar në bashkëkryerje, me dashje dhe përgatitje paraprake kanë planifikuar për ta privuar nga jeta tani të ndjerin zyrtarin e policisë, rreshterin M.L., me detyrë në Stacionin Policor në Kaçanik, ku viktima pas përfundimit të orarit të punës ora 22:53, rrugës për në banesën e tij, i njëjti ishte përcjell në vazhdimësi nga madhorët deri te hyrja e banesës së tij ku pasi që hynë në objektin e banesës ku ka jetuar duke u ngjitur shkallëve, i mituri i shkon nga mbrapa dhe pasi që viktima hynë në objektin banesor, i mituri me të takuar të ndjerin ka shtënë në drejtim të tij me armë zjarri dhe në vend ngjarje janë gjetur katër gëzhoja të kalibrit 9.19 mm dhe nga plagët e marra nga predhat e armës së zjarrit, viktima M.L., ka ndërruar jetë, me këtë në bashkëkryerje, të pandehurit do të kryenin veprën penale “Vrasje e rëndë”nga neni 173 paragrafi 1 nën paragrafi 1.9 lidhur me nenin 31 të Kodit Penal të Republikës së Kosovës Nr. 06/L-074. Të pandehurit që nga data 22 Prill 2025, me vendim të Prokurorit të Shtetit gjenden nën masën e ndalimit 48 orësh për veprën penale të lartëcekur”, thuhet në njoftim.