Këshilli i Sigurimit i Kombeve të Bashkuara ka miratuar një rezolutë që dënon sulmet e Iranit ndaj vendeve të Gjirit dhe Jordanisë, duke i bërë thirrje Teheranit që të ndërpresë menjëherë veprimet ushtarake.
Rezoluta u miratua me 13 vota pro nga gjithsej 15 anëtarë të Këshillit, ndërsa Kina dhe Rusia abstenuan, pa përdorur të drejtën e vetos.
Në dokument dënohen sulmet iraniane dhe shënjestrimi i infrastrukturës në rajonin e Gjirit, përfshirë portet dhe objektet energjetike, ndërsa kërkohet ndalimi i menjëhershëm i armiqësive.
Pas votimit, ambasadori i Iranit në OKB, Amir-Saeid Iravani, reagoi duke e cilësuar vendimin si një padrejtësi të qartë ndaj vendit të tij dhe akuzoi Shtetet e Bashkuara të Amerikës dhe Izraelin se mbajnë përgjegjësi për nisjen e konfliktit.
Ndërkohë, një projekt-rezolutë tjetër e propozuar nga Rusia, e cila kërkonte ndërprerjen e menjëhershme të veprimeve ushtarake nga të gjitha palët në Lindjen e Mesme, nuk arriti të marrë votat e mjaftueshme për t’u miratuar.