Të martën, më 29 korrik, komandanti i misionit KFOR të udhëhequr nga NATO, Gjeneral Major Enrico Barduani, ka autorizuar Forcën e Sigurisë së Kosovës (FSK) të vendosë ekipe kërkim-shpëtimi (SAR) në zonën e Liqenit të Ujmanit.
Sipas njoftimit të KFOR-it, ky autorizim u dha me qëllim që të intensifikohen përpjekjet për gjetjen e një 33-vjeçari që dyshohet se u hodh të dielën në Ujman.
“Autorizimi u dha në përputhje të plotë me prerogativat dhe autoritetet e Komandantit të KFOR-it, për të maksimizuar përpjekjet e vazhdueshme për të gjetur një burrë 33-vjeçar që raportohet se ka hyrë në liqen disa ditë më parë. Ai është i kushtëzuar nga kërkesat specifike dhe i vendosur nga KFOR-i, i cili gjithashtu do të ofrojë siguri gjatë gjithë operacionit”, thuhet në njoftim.
KFOR-i gjithashtu ka marrë përsipër sigurinë gjatë gjithë operacionit.
Përdorimi i ekipeve të kërkim-shpëtimit të FSK-së bazohet në mandatin e kësaj force, i cili përfshin mbështetjen e komuniteteve lokale në rast fatkeqësish natyrore dhe kryerjen e operacioneve të kërkim-shpëtimit.
Në të njëjtën kohë, KFOR-i vazhdon të zbatojë mandatin e tij sipas Rezolutës 1244 të Këshillit të Sigurimit të OKB-së (1999), duke siguruar një ambient të sigurt dhe lirinë e lëvizjes për të gjithë banorët e Kosovës në mënyrë të paanshme.