As pas 3 muajve Këshilli Gjyqësor e ai Prokurorial i Kosovës, nuk kanë ndërmarrë ndonjë vendim për dorëheqjen e gjyqtarëve e prokuroreve serb në veri.
Në shenjë pakënaqësie, ndaj vendimeve të qeverisë së Kosovës, nëntorin e vitiz të kaluar rreth 20 gjyqtarë e 10 prokurorë nga radhët e komunitetit serb dorëzusn dorëheqjet e tyre në Këshillin Gjyqësor dhe atë Prokurorial.
Nga KPK-ja, nuk kanë ndryshuar përgjigjen, e thënë që nga viti i kaluar, duke mos treguar se kur pritet të përfundojë shqyrtimi i dorëheqjeve të prokurorëve.
Në përgjigje thuhet se pas dorëheqjeve, kërkohet një analizë dhe vlerësim i gjendjes, dhe për këtë është marr vendim për transferimin e 3 prokurorëve ne Mitrovicë.
“Këshilli Prokurorial i Kosovës, pas takimit të mbajtur më datën 8 nëntor 2022, në të cilin ka diskutuar për situatën e krijuar në Prokurorinë Themelore të Mitrovicës, pas dorëheqjes së prokurorëve dhe stafit administrativ serb, ka konstatuar se paraprakisht nevojitet një analizë dhe vlerësim i gjendjes së krijuar dhe me këtë rast ka marrë vendim që të dërgojë tre (3) prokurorë në transferim të përkohshëm për të ndihmuar në mirëfunksionimin e punës në këtë prokurori të vendit.”, thuhet nga Këshilli Prokurorial i Kosovës.
Në Këshillin Gjyqësor të Kosovës, nuk janë përgjigjur gjatë së mërkurës, në lidhje me shqyrtimin e dorëheqjeve të gjyqtarëve serb.
Kryesuesi i KGJK-së, Albert Zogaj, më herët kishte deklaruar se gjatë muajit shkurt, do të ketë një shqyrtim rreth aprovimin ose jo të dorëheqjeve të gjyqtarëve e puntorëve të tjerë në Gjykatat në veri.
“Gjatë muajit shkurt do të trajtohen sepse janari është muaj i intervistave për gjyqtar në KGJK”, ka thënë Zogaj.
Ai kishte treguar se gjyqtarët që kanë shkelur etikën, do vihen para përgjegjësisë.
Politike situatën e krijuar me sistemin e drejtësisë në veri, e konsideron avokati Yll Zekaj, për çka thotë se kërkohet presion në drejtim të Serbisë, që të heq dorë nga ndikimi në institucionet e drejtësisë në veri.
“Besoj që duhet një intervenim i faktorit ndërkombëtar, një presion i faktorit ndërkombëtar, i shtetit të QUINT-it, ndaj shtetit të Serbisë, që të mos interferoi gjyqësorin, të lejojë që gjyqtarët dhe prokurorët të kthehen në pozitat e tyre, dhe pastaj të kemi normalizim të situatës, deri atëherë do të kemi një gjendje të tillë.”, ka thënë Zekaj.
Pas dorëheqjes së prokurorëve e gjyqtarëve serb në veri, puna e institucioneve të drejtësisë është vështirësuar, për çka së së fundmi, me vendim të KGJK-së janë transferuar më shumë se 80 lëndë nga Gjykata Themelore e Mitrovicës në gjykata të tjera.